Кыргыз Республикасынын Эмгек, социалдык камсыздандыруу жана миграция министрлиги жумуш берүүчүлөргө эмгек кодексинин жаңы нормаларына ылайык, айлык акынын мөөнөтүндө төлөнүшүнүн маанилүүлүгүнө көңүл бурду.
Ведомстводо документ жумушчуларга акча төлөөнүн кечиктирилиши үчүн бирдиктүү айыппулдун өлчөмүн киргизерин такташты.
Эгер айлык акы, отпуск акчасы же жумуштан бошотулганда эсептешүүлөр убагында төлөнбөсө, жумуш берүүчү ар бир кечиктирилген күн үчүн карыздын суммасынан 0,25% өлчөмүндө айыппул төлөөгө милдеттүү.
Ошондой эле жаңы Эмгек кодексинде мындай иштер боюнча доо коюу мөөнөтү белгиленген. Жумушчу төлөм жүргүзүлүшү керек болгон учурдан баштап үч жыл ичинде сотко кайрылууга укуктуу.
Министрликте бул чаралар жарандардын эмгек укуктарын коргоого жана жумуш берүүчүлөрдүн жоопкерчилигин жогорулатууга багытталганын белгилешти.
