Иш-чарада мэр Жанарбек Акаев, шаардык кеңештин төрагасы Болот Баетов, ошондой эле муниципалдык ишканалардын жетекчилери жана тармактын кызматкерлери катышты.
Жанарбек Акаев коммуналдык тармактын шаарды жашоо менен камсыздоодогу маанилүүлүгүн жана анын жарандардын жашоо деңгээлине түздөн-түз таасирин баса белгиледи.
Ошондой эле, 2026-жылы ушул тармактын кызматкерлеринин айлык акысы эки эсе көбөйтүлөрү пландалып жатканын билдирди.
Иш-чаранын жүрүшүндө мэрия тарабынан мыкты кызматкерлерге ардак грамоталар жана ыраазычылык каттары тапшырылды.
Мындан тышкары, 13 кызматкер Ташкентке, 10 кызматкер Мамакеев атындагы санаторийге ден соолукка кам көрүү үчүн жолдомо алышты. Ошондой эле акчалай сыйлыктар тапшырылды.
Салтанаттуу иш-чара концерттик программа менен аяктады.
