Бүгүн Бишкекте Кыргыз футбол союзунун президенти Камчыбек Ташиевдин Премьер-лига КРге катышкан клубдардын өкүлдөрү менен жолугушуусу өттү. КФС тарабынан уюштурулган иш-чарага Кыргыз профессионалдык футбол лигасынын жетекчилери жана «Дордой», «Алга», «Илбирс», «Бишкек Сити», «Азиягол», «Кыргызалтын», «Абдыш-Ата», «Талант», «Нефтчи», «Мурас Юнайтед», «Өзгөн», «Алай», «ОшМУ», «Барс», «Токтогул» жана «Азия» сыяктуу клубдар катышты.
Жолугушуунун жүрүшүндө Кыргыз Премьер-лигасына катышуучулардын курамын кеңейтүү чечими кабыл алынды. 2025-жылы өлкө чемпионатында 14 команда катышкан, эми аларга «Токтогул» клубу жана Омурбек Бабановдун колдоосу менен талас командасы «Азия» кошулду.
Ошентип, чемпионаттагы командалардын жалпы саны 16га көбөйдү.
Жыйында 2025-жылдагы сезондун жыйынтыгы боюнча КФСтин отчеттору жана футбол инфраструктурасын өнүктүрүү боюнча маалыматтар сунушталды. Ошондой эле Кыргыз профессионалдык футбол лигасы 2026-жылдагы сезонго пландарын жарыялады.
Жолугушуунун маанилүү жагы чемпионаттардын аталышын өзгөртүү тууралуу жарыя болду: Премьер-лига эми Жогорку лига деп аталат, ал эми Улуттук лига — Биринчи лига.
Жаңы сезондон баштап Биринчи лиганын жеңүүчүсү Жогорку лигага түз жолдомо алат, ал эми акыркы, 16-орунду ээлеген команда классын төмөндөтүп, Биринчи лигага өтөт. Бул өзгөртүү да жыйындын темасы болду. ```
