Бул Кыргызстан президентинин Пакистанга акыркы 20 жылда болгон биринчи визити
4-декабрда Кыргызстан президенти Садыр Жапаров Исламабадда өзүнүн мамлекеттик визити алкагында Пакистан премьер-министри Шахбаз Шариф менен жолугушту. Бул тууралуу Кыргызстан башчысынын расмий сайтында билдирилди.
Переговорлор учурунда саясат, экономика, соода, транспорт жана энергетика сыяктуу тармактарда кызматташтыкты күчөтүү маселелери талкууланды. Биргелешкен маданий жана инфраструктуралык долбоорлорго өзгөчө көңүл бурулду.
«Пакистан премьер-министри Садыр Жапаровду жылуу тосуп алып, бул визит эки тараптуу мамилелерде жаңы доорду ачат деп белгиледи. Ал Кыргызстандын экономикалык жетишкендиктерин жогору баалап, биргелешкен аракеттердин өнөктөштүктү күчөтө алаарына ишеним билдирди. Шахбаз Шариф ошондой эле долбоорлордун ийгиликтүү ишке ашырылышы эки өлкө ортосундагы сооданын көлөмүн 200 миллион долларга чейин жогорулатууга мүмкүнчүлүк берет деп баса белгиледи», — деп айтылат расмий билдирүүдө.
Садыр Жапаров өз кезегинде Пакистанды тарыхый жана маданий жактан жакын бир тууган өлкө катары белгилеп, саясий диалогду активдештирүү жана кызматташтыкты тереңдетүү ниетин билдирди.
Тараптар ошондой эле «Кытай — Кыргызстан — Өзбекстан» темир жол долбоорун жана Кыргызстанды эл аралык рынокторго жеткирүүнү жеңилдетүү үчүн Пакистандагы Карачи жана Гвадар деңиз портторун пайдаланууну талкуулашты.
Мындан тышкары, Борбордук жана Түштүк Азиядагы энергетикалык байланыштарды өнүктүрүү үчүн маанилүү роль ойногон CASA-1000 энергетикалык долбоорун ишке ашыруу аспектилери да талкууланды.
