6-февралда Бишкек шаардык кеңешинин экономика, бюджет, финанс жана инвестициялар боюнча туруктуу комиссиясынын жыйынында «Жаны-Куч» партиясынан депутат Татьяна Кузнецова борбордун билим берүү мекемелеринде компьютерлердин бар экендиги тууралуу суроо берди.
«Информатика 9-класска чейин окутулат, жана сабактардын саны билим берүү программасына ылайык болушу керек. Окуучулар компьютерлерсиз материалды ийгиликтүү өздөштүрө алабы?» - деп кызыкты.
Жооп катары Бишкек мэриясынын Билим берүү департаментинин директору Рахат Мусаева Билим берүү министрлиги жогорку класстын окуучуларын (9-11-класстар) планшеттер менен камсыздоо боюнча суроо жөнөткөнүн түшүндүрдү. Департамент зарыл болгон эсептөөлөрдү жүргүзүп, аларды Министрликке жибергенин, сумма чоң болорун белгиледи.
Татьяна Кузнецова ошондой эле ушул планшеттерде электрондук окуу китептерин колдонуу каралганбы деген суроо берди.
Рахат Мусаева бул фактты тастыктады.
Мындан тышкары, департаменттин директору быйыл компьютерлерди сатып алуу үчүн бюджетте 14 миллион 140 миң сом бөлүнгөнүн билдирди. Бардык региондор мугалимдер үчүн ноутбуктарды алышты, Бишкек да жакын арада өз партиясын алат, деп кошумчалады.
