Кыргызстанда кар барысынын корголушун камсыз кылуу максатында 2030-жылга чейин иш-чаралардын планы иштелип чыккан. Бул тууралуу Жогорку Кеңештин комитетинин жыйынында экология, табигый ресурстар жана техникалык көзөмөл министринин орун басары Асель Райымкулова билдирген.
Анын айтымында, ишке ашырылган чаралардын натыйжасында өлкөдөгү кар барысынын саны 550дөн ашып кеткен.
«Корголгон табигый аймактардын абалын жакшыртуу максатында кар барысы үчүн коридор түзүлгөн. Анын аянты 792 миң гектарды түзөт жана Хан-Тенгри, Сары-Чат - Эрташ жана Нарын аймактарын камтыйт. Ошондой эле, «Байбосун», «Котормо» жаратылыш коругучтары жана илимдер академиясынын ботаникалык паркы атайын корголуучу аймактардын тизмесине киргизилген», - деп кошумчалады ал.
