Салык жана Эмгек кодекстериндеги өзгөрүүлөр
Мамлекеттик салык кызматы соодада накталай акча каражаттарынын колдонулушу улантылып жатканын билдирип, накталай акчалардын толук тыюу салынары тууралуу ушактарды четке какты.
Ведомстводо салык жана эмгек кодекстерине киргизилген өзгөртүүлөр финансылык операциялардын ачык-айкындуулугун жогорулатууга, керектөөчүлөрдүн укуктарын коргоого жана көлөкө экономикасынын деңгээлин төмөндөтүүгө багытталганын түшүндүрүштү. Бул өзгөртүүлөр накталай акчаларды колдонууга тыюу салбайт, бирок нактасыз төлөм каражаттарын колдонууда мыйзам бузуулар үчүн жоопкерчилик киргизет.
2026-жылдын 1-январынан баштап ишкерлерге бизнес операциялары үчүн жеке колдонууга катталган POS-терминалдар, QR-коддор жана электрондук капчыктар сыяктуу төлөм инструменттерин колдонууга тыюу салынат.
Алгачкы мыйзам бузуу эскертүү менен жазаланат. Бирок кайталанган мыйзам бузуулар үчүн төмөнкү айыппулдар каралган:
жеке адамдар үчүн — 50 эсептик көрсөткүч, кайталанган учурда — 130;
юридикалык жактар үчүн — 280 эсептик көрсөткүч, кайталанган учурда — 650.
Мындан тышкары, салык органдарына маалымат берүү боюнча милдеттерин аткарбагандыгы үчүн банктарга 650 эсептик көрсөткүч өлчөмүндө айыппул киргизилет.
Эмгек кодексиндеги өзгөртүүлөргө ылайык, 2026-жылдын 1-январынан баштап, жеке ишкерлер болгон жумуш берүүчүлөр чет өлкөлүк жумушчуларга эмгек акыны нактасыз формада гана төлөшү керек. Сезондук жумуштар, өзгөчө кырдаалдар жана банктын инфраструктурасынын жоктугу сыяктуу учурлардан тышкары.
Сүрөт www
