Учурда 1,5 миңден ашык Кыргызстандын жарандары EPS программасы боюнча Түштүк Кореяда иштеп жатышат.
21-октябрда Бишкекте Түштүк Кореяда ишке жөнөтүлгөн 20 кыргызстандык үчүн алдын ала даярдык курсу өткөрүлдү, ал Employment Permit System (EPS) системасынын алкагында уюштурулду.
Бул иш-чараны Кыргызстандын Эмгек, социалдык камсыздоо жана миграция министрлигинин алдындагы чет өлкөдөгү жумушту камсыздоо борбору уюштурду.
Даярдык учурунда борбор катышуучулар үчүн беш күндүк окутуу курсун уюштурду, ал корей тилин үйрөнүүгө жана аны жумушчу чөйрөдө практикалык колдонууга басым жасады.
Курс бир нече негизги багыттарды камтыйт:
- Маданияттар аралык түшүнүү жана адаптация — корей маданияты, тарыхы жана салттары менен таанышуу;
- Социалдык нормалар жана эмгек этикасы — жумуш ордундагы байланыш жана жүрүм-турум эрежелери;
- Корей тилин тереңдетип үйрөнүү — ийгиликтүү интеграция үчүн сүйлөө көндүмдөрүн өнүктүрүү;
- Практикалык даярдык — өндүрүш чөйрөсүнө адаптация жана жетекчилик менен өз ара аракеттенүү.
Чет өлкөдөгү жумушту камсыздоо борбору 18 жылдан бери EPS программасын ишке ашырып келет. Түштүк Кореянын Эмгек министрлиги менен эки тараптуу кызматташтыктын натыйжасында 5 миңден ашык Кыргызстандын жарандары бул меморандумдун алкагында жумуш табышты.
Учурда 1,5 миңден ашык кыргызстандык EPS программасы боюнча Түштүк Кореяда иштеп жатат, алардын көпчүлүгү тамак-аш, химия, кагаз жана пластик, резина жана айнек буюмдарын өндүрүүчү заводдордо иштешет.
Кыргызстандык жумушчулардын Кореядагы орточо кирешеси болжол менен 1500 АКШ долларын түзөт, ал эми турак жай жана тамак-аш чыгымдарын (жарым-жартылай же толугу менен) жумуш берүүчү төлөйт.
Программанын негизги талабы — корей тилин жакшы билүү, бул талап талапкердин эмгек жана маданий адаптацияга даяр экендигин көрсөтөт.
Чет өлкөдөгү жумушту камсыздоо борбору кыргызстандыктардын мыйзамдуу миграция мүмкүнчүлүктөрүн кеңейтүү жана эл аралык эмгек рыногунда алардын атаандаштыкка жөндөмдүүлүгүн жогорулатуу боюнча ишин улантууда.
Министрликтин сүрөтү
