15-ноябрда Ташкентте министрлердин жыйыны болуп өттү, ага Кыргызстандын тышкы иштер министри Жээнбек Кулубаев катышты. МИДдин маалыматына ылайык, жыйында Борбордук Азия мамлекеттеринин башчыларынын жетинчи Консультативдик жолугушуусуна даярдык маселелери каралды.
Катышуучулар жыйындын күн тартибин, жыйындын жыйынтыгы боюнча документтердин долбоорлорун талкуулашты, ошондой эле саясий кызматташтыкты күчөтүү жана региондогу актуалдуу маселелерди чечүү үчүн конкреттүү кадамдарды иштеп чыгышты, Борбордук Азиянын туруктуу өнүгүүсүнө жана гүлдөнүшүнө багытталган биргелешкен иш үчүн жаңы приоритеттерди аныкташты.
Кулубаев Кыргызстандын коңшулук принциптерине берилгендигин тастыктап, Борбордук Азияда калктын жашоосун жакшыртууга жана туруктуулукту бекемдөөгө көмөктөшүүчү регионалдык демилгелерди ишке ашырууда активдүү катышууга даяр экенин билдирди. ```
