Жолугушууда, Кыргыз Республикасынын Министрлер кабинетинин төрагасы Адылбек Касымалиев менен Азия өнүктүрүү банкынын президенти Масато Канда ортосунда, Кыргызстан менен АБРдин кызматташтыгынын маанилүү аспекттери талкууланды. Мында өлкөдөгү учурдагы экономикалык абал, 2030-жылга чейин улуттук өнүгүү программасы, ошондой эле климаттык маселелер жана энергетика сектору боюнча маселелер каралды.
Адылбек Касымалиев Кыргыз Республикасынын экономикасы акыркы жылдарда негизги секторлорду өнүктүрүүгө комплекстүү мамиле жасоонун натыйжасында олуттуу өсүштү көрсөтүп жатканын белгиледи.
«Акыркы үч жылда экономикадагы орточо өсүү темпи 9,0 % түздү. Азыркы жылдын башынан бери экономикалык активдүүлүк жогору бойдон калууда, 2025-жылдын он айында ИДПнын өсүшү 10,0 % түздү», - деди Министрлер кабинетинин жетекчиси.
2030-жылга чейин Кыргыз Республикасынын жаңы улуттук өнүгүү программасында туруктуу экономикалык өсүшкө, жарандардын жашоо сапатын жакшыртууга жана негизги секторлорду өнүктүрүүгө негизги көңүл бурулган. Төрт негизги багыт аныкталган: индустриализация, регионалдык хаб түзүү, айыл чарба жана туризм, ошондой эле жашыл энергетика. Тараптар ушул тармактардагы эки тараптуу кызматташтыкты да талкуулашты.
Кыргыз Республикасы менен Азия өнүктүрүү банкынын ортосундагы жолугушуунун натыйжасында бир катар келишимдерге кол коюлду, анын ичинде коомдук имараттарды жашыл трансформациялоо программасы, энергияны үнөмдөөчү жана жеткиликтүү турак жайга мүмкүнчүлүктү кеңейтүү, ошондой эле суу ресурстарынын климаттык өзгөрүүлөргө жана табигый кырсыктарга туруктуулугун жогорулатуу маселелери каралды. ```
