ЦАРЭС бизнес-форумунда экономика жана соода министри Бакыт Сыдыков Кыргызстанды 2030-жылга чейин өнүктүрүү улуттук программасынын негизги багыттарын сунуштады. Ал иш-чаранын катышуучулары үчүн бул документтин негизги максаттары жана милдеттерин белгиледи.
Министрдин айтымында, өлкөнүн экономикасынын туруктуу өсүшү туура инвестициялык саясат жана ири долбоорлорду ишке ашыруу аркылуу камсыздалууда.
«Акыркы үч жылдын ичинде биз экономикабыздын рекорддук өсүш темптерин байкап жатабыз — жылына орточо 9 пайыз. ИДП 2022-жылы 1 триллион 20,7 миллиард сомдон 2024-жылы 1 триллион 523,2 миллиард сомго чейин өстү. Экономиканын бардык секторлору оң динамиканы көрсөттү: өнөр жай — 7 пайыз, айыл чарба — 5 пайыз, курулуш — 16 пайыз, кызматтар — 8 пайыз. Бул өсүш инвестицияларды тартуунун натыйжасында мүмкүн болду. Белгиленген мезгилде биз $23 миллиардга жакын инвестиция тарттык, анын ичинде $3,7 миллиард түз чет элдик инвестициялар. Биз бизнес климатын жакшыртуу боюнча үзгүлтүксүз иш алып барабыз, эрежелерди жеңилдетип, керексиз тоскоолдуктарды жоюп, инвесторлордун укуктарын коргоону камсыздайбыз», — деди ал.
Министр ошондой эле 2030-жылга чейин Кыргызстанды өнүктүрүү боюнча стратегиялык документти сунуштады.
«Программаны ишке ашыруу алкагында биз ИДПнын жыл сайын 8 пайыздан кем эмес өсүшүн камсыздоону пландап жатабыз. Бул экономика көлөмүн $30 миллиардга жеткирүүгө жана адам башына ИДПны $4,5 миңге чейин жогорулатууга мүмкүндүк берет. Негизги приоритеттерге адамдык капиталды өнүктүрүү, билим берүү жана медицина сапатын жана жеткиликтүүлүгүн жакшыртуу, кичи жана орто бизнести колдоо, инвестицияларды тартуу жана жумушсуздук деңгээлин 5 пайызга чейин төмөндөтүү кирет», — деп кошумчалады Бакыт Сыдыков.
Ал экономикалык өсүштү камсыздоо үчүн төрт негизги багытты белгиледи: индустриализация, айыл чарба жана туризмди өнүктүрүү, регионалдык хабды түзүү жана жашыл энергетика.
«Белгиленген максаттарды ишке ашыруу үчүн мамлекеттин, бизнестин, жарандардын жана эл аралык өнөктөштөрдүн бардык катышуучуларынын консолидацияланган иши зарыл. Биз өнөр жай өндүрүшүнүн көлөмүн эки эсе көбөйтүп, өнөр жайдагы негизги капиталга инвестициянын үлүшүн 50 пайызга чейин жогорулатуу милдетин койдук. Машина куруу, фармацевтика, текстиль өнөр жайы жана курулуш материалдарын өндүрүү сыяктуу секторлорду өнүктүрүү пландаштырылууда, ошондой эле заманбап технологияларды киргизүү. Бул экспорттук потенциалды кыйла жогорулатат жана жаңы жумуш орундарын түзөт», — деп жыйынтыктады Бакыт Сыдыков.
