Бишкекте эки күндүк Борбордук Азия регионалдык экономикалык кызматташтык (ЦАРЭС) бизнес-форуму ачылды. Бул тууралуу Кыргыз Республикасынын Экономика жана соода министрлиги маалымдады.
Министр Бакыт Сыдыков бул окуя 15 жылдан бери биринчи жолу өткөн бизнес-форум экенин белгиледи.
Ал иш-чара Кыргызстан ЦАРЭСте төрагалык кылган жылда жана 20-ноябрда өтө турган 24-минстрлер конференциясынан мурда болуп жатканын кошумчалады.
«Бүгүнкү күнү дүйнө глобалдык жеткирүү чынжырларында маанилүү өзгөрүүлөрдү башынан өткөрүүдө, мультимодалдык маршруттардын мааниси өсүүдө, жана Борбордук Азия эң ири дүйнөлүк базарлардын ортосундагы көпүрө катары стратегиялык мааниге ээ болуп жатат. Мындай шарттарда ЦАРЭСке катышуучу өлкөлөр инфраструктуралык, технологиялык жана экологиялык көйгөйлөр сыяктуу жаңы чакырыктарга, ошондой эле инвестициялар жана регион аралык соода үчүн жаңы мүмкүнчүлүктөргө туш болууда. Ошондуктан ЦАРЭС бизнес-форуму бизнес менен мамлекеттик структуралардын өз ара аракеттешүүсү үчүн платформаны түзүүдө маанилүү», - деди министр.
Бакыт Сыдыков ошондой эле Кыргызстан ЦАРЭСтин төрагасы жана активдүү катышуучусу катары байланыштуулукту, туруктуулукту, санариптештирүүнү жана региондун инвестициялык тартуучулугун жакшыртууга багытталган инициативаларды колдоону уланта берерин баса белгиледи.
Бизнес-форумга жеке сектордун негизги оюнчулары, өкмөттөрдүн өкүлдөрү, эл аралык финансылык уюмдар жана ЦАРЭС өлкөлөрүнөн инновациялык компаниялар чогулушту. 200дөн ашык катышуучу логистика, санариптик соода, финтех, агротехнологиялар, жашыл энергетика жана туруктуу туризм сыяктуу экономикасынын маанилүү секторлорун сунушташат. ```
