Кыргызстандын борбору Бишкекте Борбордук Азия региондук экономикалык кызматташтыгына арналган бизнес-форум башталды.
Экономика жана соода министри Бакыт Сыдыков өз сөзүндө 2030-жылга чейин пландалган Улуттук өнүктүрүү программасынын негизги багыттарын талкуулады.
Бүгүн, 19-ноябрда, форумдун экинчи күнү өтүп жатат, анда Кыргыз Республикасын өнүктүрүүгө басым жасалууда.
Модератор жана негизги докладчы катары чыккан Бакыт Сыдыков форумдун катышуучуларына өлкөнүн экономикасынын учурдагы көрсөткүчтөрү тууралуу маалымат берип, 2030-жылга чейин Улуттук өнүктүрүү программасынын маанилүү максаттарын белгиледи.
Ал эффективдүү инвестициялык саясат жана ири долбоорлорду ишке ашыруу аркылуу Кыргызстандын экономикасы оң тенденцияларды көрсөтүп жатканын белгиледи.
“Акыркы үч жылда биз жыл сайын 9% деңгээлинде экономикабыздын орто өсүшүн байкап жатабыз. ИДП 2022-жылы 1 020,7 миллиард сомдон 2024-жылы 1 523,2 миллиард сомго чейин өстү. Экономиканын бардык секторлору оң динамиканы көрсөттү: өнөр жай 7%, айыл чарба 5%, курулуш 16%, ал эми кызмат көрсөтүү 8% өстү. Бул өсүш негизинен 23 миллиард долларга жакын инвестицияларды тартуу менен камсыздалды, анын ичинде 3,7 миллиард доллар түз чет элдик инвестициялар. Биз ошондой эле бизнес климатын жакшыртууну улантуудабыз, ашыкча тоскоолдуктарды жоюп, инвесторлордун укуктарын коргоону камсыз кылуудабыз”, - деп баса белгиледи министр.
Андан кийин Сыдыков Кыргызстандын 2030-жылга чейин өнүктүрүү боюнча стратегиялык документти сунуштады.
“Биз ИДПнын туруктуу өсүшүн жылына кеминде 8% камсыз кылууну пландап жатабыз, бул бизге экономикабыздын көлөмүн 30 миллиард доллардан кем эмес деңгээлге жеткирүүгө жана адам башына ИДПны 4500 долларга чейин көбөйтүүгө мүмкүндүк берет. Биздин негизги приоритеттерибиз адам капиталынын өнүгүшү, билим берүү жана медицина сапатынын жана жеткиликтүүлүгүнүн жакшыртылышы, кичи жана орто бизнести колдоо, инвестицияларды тартуу, ошондой эле жумушсуздук деңгээлин 5% га чейин төмөндөтүү”, - деп кошумчалады ал.
Экономикалык өсүштү камсыз кылган негизги факторлордун арасында министр төрт негизги багытты белгиледи: индустриалдаштыруу, айыл чарба жана туризмди өнүктүрүү, регионалдык хабды түзүү жана жашыл энергетиканы өнүктүрүү.
“Бул максаттарга жетүү үчүн коомдун бардык катмарларынын: мамлекеттин, бизнестин, жарандардын жана эл аралык өнөктөштөрдүн күч-аракеттерин бириктирүү зарыл. Биз өнөр жай өндүрүшүнүн көлөмүн эки эсеге көбөйтүүнү жана негизги капиталга инвестициялардын үлүшүн 50% га чейин жогорулатууну көздөп жатабыз. Машина куруу, фармацевтика, текстиль өндүрүшү жана курулуш материалдарын өндүрүү сыяктуу секторлорду өнүктүрүү пландаштырылууда, ошондой эле заманбап технологияларды киргизүү. Бул экспорттук потенциалды жогорулатууга жана жаңы жумуш орундарын түзүүгө мүмкүндүк берет”, - деп жыйынтыктады Бакыт Сыдыков.
