Ош шаарында казак акыны жана философу Абай Кунанбаевге арналган көчө, эстелик жана музейдин салтанаттуу ачылышы болду. Иш-чарага Кыргызстандын маданият, маалымат жана жаштар саясаты министринин орун басары Аскаралы Мадаминов, Казакстандын маданият жана маалымат министри Айда Балаева, Ош шаарынын мэри Жанышбек Токторбаев сыяктуу жогорку деңгээлдеги коноктор катышты. Церемонияда дипломатиялык мекемелердин өкүлдөрү жана чыгармачылык интеллигенциянын өкүлдөрү да болушту.
Казакстандын маданият жана маалымат министри Айда Балаева бул долбоорду ишке ашыруудагы маанилүүлүгүн белгилеп, эки коңшу мамлекеттин маданий байланыштарын бекемдөөгө кошкон салымы үчүн ыраазычылык билдирди.
Иш-чаранын жүрүшүндө Ош шаарынын мэри Жанышбек Токторбаев Казакстандын президентинин жарлыгы боюнча II даражадагы «Достук» ордени менен сыйланды. Бул сыйлык элдер ортосундагы достукту жана кызматташтыкты бекемдөөгө болгон аракеттери үчүн берилди.
Мындан тышкары, Айда Балаева өзүнүн визити учурунда Кыргызстандын эң маанилүү музей комплекстеринин бири — ЮНЕСКОнун дүйнөлүк мурас объектиси болгон «Сулайман-Тоо» улуттук тарыхый-археологиялык музей комплексин көрүп чыкты. ```
