31-октябрда Казакстанда Чет өлкөлөр министрлигинин имаратында салтанаттуу сыйлык тапшыруу аземи өттү. Бул тууралуу Кыргыз Республикасынын Чет өлкөлөр министрлигинин маалымат кызматы маалымдады.
Казакстан Республикасынын Чет өлкөлөр министри Ермек Кошербаев Кыргыз Республикасынын Казакстандагы элчиси Дастан Дюшекеевге «Достук» II даражадагы орден тапшырды. Бул окуя 25-октябрда белгиленген Республика күнү менен байланыштуу өткөрүлдү.
Бул жогорку сыйлык Казакстан президентинин жарлыгы менен Дюшекеевдин Кыргызстан менен Казакстан ортосундагы стратегиялык өнөктөштүктү бекемдөө жана өнүктүрүүгө кошкон маанилүү салымын таануу максатында берилди.
Азем учурунда Ермек Кошербаев Дюшекеевдин эки тараптуу саясий диалогду өнүктүрүү, соода-экономикалык кызматташтыкты кеңейтүү жана эки элдин маданий байланыштарын бекемдөө боюнча активдүү ишмердүүлүгүн белгиледи.
«Достук» ордени мамлекеттер ортосундагы тынчтык жана достукту бекемдөө үчүн атайын жетишкендиктер үчүн берилген Казакстандын эң кадыр-барктуу сыйлыктарынын бири болуп саналат.
