Азербайжандагы жумушчу сапарынын алкагында өкмөт башчынын орун басары жана суу ресурстары, айыл чарба жана кайра иштетүү өнөр жайы министри Бакыт Торобаев кем куруу жана мунай продуктуларын жеткирүү боюнча кызматташтыкты кеңейтүү тууралуу маанилүү сүйлөшүүлөрдү өткөрдү.
Торобаев Бакуда «Бакы кем куруу заводу» ААКнын башкармалыгынын төрагасы Руслан Талыбов менен жолукту.
Кыргыз тарап заводдун мүмкүнчүлүктөрү, анын ичинде транскаспий эл аралык транспорт коридорун тейлөө үчүн паромдор жана башка кемелерди куруу боюнча маалымат алды.
Сүйлөшүүлөрдүн жүрүшүндө тараптар паромдорду транспорт-логистика муктаждыктары үчүн пайдалануу, анын ичинде Каспий деңизинде кыргыз паромдорун колдонуу боюнча кызматташтык мүмкүнчүлүктөрүн карашты. Мындай өз ара аракеттешүү Кыргызстандагы транспорт маршруттарын көп түрдүүлүккө ээ кылууга, жүк жеткирүүнүн убактысын кыскартууга жана жергиликтүү бизнесин атаандаштыкка жөндөмдүү кылууга жардам берет.
Мындан тышкары, Торобаев Азербайжандын мамлекеттик мунай компаниясынын (SOCAR) вице-президенти Анар Мамедов менен жолугушту. Бул жолугушууда Кыргызстанга күйүүчү-майлоочу материалдарды жеткирүү мүмкүнчүлүктөрү, ошондой эле энергияны үнөмдөө, процесстерди санариптештирүү жана экологиялык таза технологияларды киргизүү боюнча тажрыйба алмашуу маселелери талкууланды.
Сапар учурунда Кыргызстандын делегациясы Гейдар Алиев атындагы мунайды кайра иштетүү заводундагы тереңдетилген мунайды кайра иштетүү жана заманбап технологиялык чечимдерди киргизүү боюнча ири долбоорлор менен таанышышты. ```
