Кыргыз Республикасынын Президенти, Садыр Жапаров, Египетте Кыргыз Республикасынын элчилигин түзүү тууралуу жарлыкка кол койду.
Жарлыкка ылайык, Араб Республикасы Египет менен саясий, соода, маданий жана илимий-техникалык байланыштарды кеңейтүүгө көмөктөшүү үчүн төмөнкүлөр каралган:
1. Египеттин борбору — Каирде Кыргыз Республикасынын элчилигин түзүү.
2. Кыргыз Республикасынын Министрлер Кабинетине:
1) Тышкы иштер министрлигинин штаттык расписаниесин 5 жаңы бирдикке көбөйтүү;
2) Египеттеги элчиликтин ишин уюштуруу жана каржылоо маселелерин чечүү;
3) Бул жарлыкка ылайык өз чечимдерин тууралоо.
3. Жарлыктын аткарылышын көзөмөлдөө Кыргыз Республикасынын Президентинин Администрациясында Президенттин жана Министрлер Кабинетинин чечимдеринин аткарылышына жооптуу башкармалыктын мойнуна жүктөлөт.
4. Жарлык расмий түрдө жарыяланат жана 2026-жылдын 1-январынан тарта күчүнө кирет.
Элчиликти түзүү Кыргызстан менен Египеттин ортосундагы саясий, экономикалык, инвестициялык, илимий, билим берүү жана маданий байланыштарды чыңдоого, ошондой эле Египетте жана Түндүк Африканын коңшу өлкөлөрүндө турган Кыргыз Республикасынын 3000ге жакын жаранына консулдук кызмат көрсөтүүнү камсыздоого багытталган.
Египеттеги элчиликтин ачылышы Кыргызстандын Африка континентиндеги тышкы саясат стратегиясын ишке ашырууда жана дипломатиялык катышууну кеңейтүү, эл аралык байланыштарды диверсификациялоодо маанилүү кадам болот.
