Агенттиктин маалыматына ылайык, форумдун негизги көңүл бурулган маселеси Жапония менен Ортолук Азиянын соода-экономикалык жана инвестициялык мамилелерин өнүктүрүү болду. Иш-чарага мамлекеттик структуралардын, бизнес өкүлдөрүнүн жана эксперттердин, анын ичинде Кыргызстандагы бизнес коомчулугунун дээрлик элүү мүчөсү катышты.
Ишкердик программасынын алкагында туруктуу өнүгүү, "жашыл" экономика түзүү, санариптештирүү жана IT-секторду өнүктүрүү, ошондой эле адам капиталы жана билим берүү программаларына байланыштуу маселелер талкууланды.
Инвестициялар боюнча улуттук агенттиктин жетекчиси Равшанбек Сабиров "Ортолук Азия + Жапония" форматынын конструктивдүү диалог түзүү жана өнөктөштүк мамилелерди чыңдоо үчүн маанилүүлүгүн белгиледи. Ал Кыргызстан Жапония менен кызматташтыкты тереңдетүүгө жана өз ара пайдалуу негизде биргелешкен инвестициялык жана инновациялык долбоорлорду ишке ашырууга кызыкдар экенин айтты.
Форум "Ортолук Азия + Жапония" эки тараптын соода-экономикалык байланыштарды кеңейтүүгө, инвестицияларды тартууга жана Жапония менен Кыргыз Республикасынын ортосунда узак мөөнөттүү стратегиялык өнөктөштүктү чыңдоого болгон ниеттерин тастыктады.
