Иш-чаранын демилгесин Кыргыз Республикасынын Президентинин алдындагы Инвестициялар боюнча Улуттук агенттиги, Германиянын чыгыш экономика комитети жана Германиянын соода-өнөр жай палатасы өзүнө алды.
Ишкердик кеңешинин отуруму Кыргыз Республикасынын Премьер-министри Адылбек Касымалиевдин жана Гамбургдагы Кыргызстан Республикасынын Почеттуу консулу Карл Элердингдин катышуусунда ачылды. Алар бизнес өкүлдөрүнүн жаңы биргелешкен долбоорлорго болгон кызыгуусунун өсүп жатканын жана экономика, билим берүү жана технологиялар тармагында байланыштарды бекемдөөнүн зарылдыгын белгилешти.
Инвестициялар боюнча Улуттук агенттиктин директору Равшанбек Сабиров учурдагы мезгил Кыргызстанга стратегикалык инвестициялар үчүн ийгиликтүү экенин баса белгиледи. Ал өлкө мамлекеттик-жекече өнөктөштүк рейтингинде 68-орундан 22-орунга көтөрүлгөнүн, 434 миллиард сомдон ашык суммадагы 90 долбоордун портфелин түзүп жатканын айтты. Сабиров ошондой эле инвестициялар жана ЖЧП боюнча жаңыланган мыйзамдар Борбордук Азиядагы инвесторлор үчүн эң заманбап укуктук негиздердин бирин камсыздай турганын билдирди. Келечекте венчурдук финансылык мыйзам каралат, бул инновациялык чечимдер үчүн жаңы мүмкүнчүлүктөрдү ачат. Ал немис жогорку технологиялык компанияларын активдүү кызматташууга чакырды.
Панелдик талкуулар учурунда катышуучулар Германиянын модели боюнча дуалдык билим берүү, уюштурулган эмгек миграциясы, энергетикалык чечимдер, "жашыл" технологиялар, маалыматтык технологиялар, айыл чарба жана медицина сыяктуу тармактарда өз ара аракеттенүүнү өнүктүрүү боюнча макулдашышты.
Форум Кыргызстан менен Германиянын экономикалык өнөктөштүгүн бекемдөөгө жана ушул өлкөлөрдүн бизнес коомчулуктарынын ортосундагы байланыштарды өнүктүрүүгө маанилүү окуя болду.
