2023-жылдын 24-декабрында Кыргыз Республикасынын тышкы иштер министри Жээнбек Кулубаев Маврикий Республикасынын тышкы иштер, регионалдык интеграция жана эл аралык соода министри Джаханджай Рамфул менен телефон аркылуу сүйлөшүү өткөрдү. Бул тууралуу Кыргызстандын Тышкы иштер министрлигинин басма сөз кызматынан билдиришти.
Сүйлөшүүнүн жүрүшүндө тараптар эки тараптуу мамилелерди өнүктүрүү мүмкүнчүлүктөрүн талкуулап, тышкы саясат ведомстволорунун ортосундагы байланыштарды активдештирүүнүн зарылдыгына келишти.
Министрлер көп тараптуу платформаларда кызматташуу жана өз ара колдоо маселелерине өзгөчө көңүл бөлүп, топтолгон кызматташтыкты натыйжалуу жогорулатуу үчүн макулдашылган аракеттердин маанилүүлүгүн баса белгилешти. Ошондой эле жогорку деңгээлдеги визиттерди алмашууну уюштуруу боюнча макулдашууга жетишилди.
