Президент коомдо мугалимдерге жана медициналык адистерге карата сыйсыздык жана агрессия учурлары көп кездешип жаткандыгын белгиледи. Ал: «Мугалим улуттун келечегин түзөт, ал эми врач — ден соолук жана өмүрдүн сакчысы. Биз бул эки маанилүү кесиптин статусун жана авторитетин кайтарууга тийишпиз» деди. Бул байланышта алардын айлыктарын кыйла жогорулатуу чечими кабыл алынды.
Мурда айлыктарды 50%га жогорулатуу пландалган, бирок финансылык мүмкүнчүлүктөрдү талдоодон кийин өкмөт алардын айлыктарын андан да жогору көтөрүү чечимин кабыл алды. «Биз медициналык кызматкерлердин жана мугалимдердин айлыктарын орточо 100%га жогорулатуу чечимин кабыл алдык, президенттик компенсациялык төлөм 15 миң сомду түзөт», — деп кошумчалады президент.
Учурда мугалимдердин орточо айлыгы 26 миң сомду түзөт, жана 2026-жылдын 1-апрелинен тартып ал болжол менен 52 миң сомго жогорулайт. Эмгек акынын көлөмү билим деңгээлине, стажына, квалификациясына, регионго жана окутуучу предметке жараша болот.
Мисалы, шаардык мектепте тажрыйбасыз жана орто педагогикалык билимге ээ жаш мугалимдин айлыгы 2026-жылдын 1-апрелинен тартып 36 миң 800 сомду түзөт, анын колуна 31 миң 200 сомго жакын акча түшөт. Жогорку тоолуу жана алыскы аймактарда узак стажы бар мугалимдердин кирешеси райондук коэффициентти эске алуу менен кыйла жогору болот. Мисалы, 30 жылдык тажрыйбасы бар математика мугалими 97 миң 600 сом табат.
Медициналык секторго келсек, учурда врачтардын орточо айлыгы 31 миң 500 сомду түзөт, жана жогорулатуу менен ал 62 миң 500 сомго жетет, ал эми адистер колуна 50 миң сомго жакын акча алышат. Шаардык шарттарда жаңы баштаган врачтын айлыгы 16 миң 900 сомдон 42 миң 100 сомго чейин жогорулайт, ал эми тоолуу аймактарда 30 жылдык стажы бар жогорку категориядагы врач 91 миң 700 сом табат.
Мындан тышкары, президент маданият жана спорт кызматкерлеринин айлыктарын жогорулатуу пландары тууралуу маалымдады. Артисттердин орточо айлыгы 46 миң 500 сомго, ал эми машыктыруучулардын айлыгы 58 миң 900 сомго жогорулайт.
2026-жылдын 1-апрелинен тартып техникалык жана кызмат көрсөтүү персоналынын айлыктары орточо 80%га жогорулайт, бул президенттик кошумча компенсациялык төлөм 5 миң сомду киргизүү менен ишке ашат.
Садыр Жапаровдун белгилөөсү боюнча, бул чаралар мугалимдердин, медициналык кызматкерлердин жана социалдык тармактын кызматкерлеринин коомду өнүктүрүүгө жана мамлекетти бекемдөөгө кошкон салымын баса белгилейт.
