Токмокто толук реконструкциядан өткөн «Космос» кинотеатрынын салтанаттуу ачылышы болду. Бул тууралуу Россия-Кыргызстан өнүктүрүү фонду тарабынан маалымдалды.
Баткен, Чолпон-Ата, Кербен, Араван, Беловодское жана Токмок сыяктуу Кыргызстандагы кичи жана орто шаарларда жайгашкан алты кинотеатрды реконструкциялоо үчүн 1 миллион 550 миң доллар АКШ каржыланды.
1973-жылы курулган кинотеатр узак убакыт бою иштебей турган. Проекттин алкагында толук модернизация жүргүзүлдү: 400 орундуу зал оңдолуп, заманбап санариптик жабдуулар орнотулуп, көрүүчүлөрдүн ыңгайлуулугу үчүн мебель жаңыртылды.
Кинотеатрдын кайра ачылышы жергиликтүү тургундар үчүн маанилүү окуя болду.
«Биздин милдетибиз инвестицияларды өнөр жайга гана эмес, жарандардын жашоо сапатын жакшыртууга да багытталган. Токмоктогу кинотеатр Кыргызстанда бирдиктүү маданий мейкиндикти түзүүгө багытталган кеңири программанын бир бөлүгү. Мындай демилгелерди колдоо — бул биздин адамдык капиталды өнүктүрүүгө жана заманбап, гармониялуу коомду калыптандырууга түздөн-түз салым», — деп комментарий берди РКФРдин башкармалыгынын төрагасы Артем Новиков.
Бул демилге жергиликтүү коомдордун өнүгүшүнө күчтүү стимул болуп, кинотеатрлар тармагында 200дөн ашык жаңы жумуш орундарын түзүп, алыста жайгашкан аймактардын тургундарын заманбап кино менен, анын ичинде жергиликтүү өндүрүштөгү фильмдер менен камсыздайт.
Проект РКФРдин колдоосу менен ишке ашырылып, президент Садыр Жапаровдун түз буйругу жана министрлер кабинетинин жардамы менен ОсОО «Атлант Синема» тарабынан жүргүзүлүүдө.
