Талкуу учурунда министр Кыргызстандагы көмүр ресурстарына негизделген жылуулук электр станцияларын (ЖЭС) куруунун маанилүүлүгүн белгиледи.
Консорциумдун өкүлдөрү 350 МВт кубаттуулуктагы үч жылуулук станциясын иштеп чыгуу, каржылоону жана курууну пландап жаткандыктарын тастыкташты, жалпы кубаттуулук 1050 МВт түзөт. Бардык долбоорлор эл аралык стандарттарга жооп берген таза көмүр технологияларын колдонуу менен ишке ашырылат. Алар ошондой эле окшош объекттерди курууда тажрыйбасы бар экенин белгилешти.
Консорциумдун маалыматы боюнча, заманбап технологияларды киргизүү көмүрдөн туруктуу, экологиялык жактан коопсуз жана үзгүлтүксүз электр энергиясын өндүрүүнү камсыздайт. Бул максаттарга жетүү үчүн көмүр кендерин изилдөө, анын ичинде күлдүк, нымдуулук, учуучу заттардын, күкүрт, фосфор жана көмүрдүн калориялуулугун анализдөө пландалууда.
Министр Ибраев консорциумдун адистерин долбоорду ийгиликтүү ишке ашыруу үчүн зарыл болгон изилдөөлөрдү жүргүзүүгө чакырды жана Энергетика министрлиги өз ыйгарым укуктарынын алкагында колдоо көрсөтөөрүн билдирди.
