Транспорт жана байланыш министрлигинин маалыматына ылайык, 2026-жылдын 17-февралында, саат 12:10 чамасында, Бишкек-Ош автожолунда Чычкан капчыгайындагы эки участокто кар көчкүндөрү түшкөн. Мунун натыйжасында “Сосновка” жана “Арал” текшерүү-өткөрүү пункттарында бардык транспорт каражаттары үчүн чектөөлөр киргизилди.
Алдын ала маалыматтар боюнча, кар көчкүндөрүнүн узундугу болжол менен 100 метрди, бийиктиги болсо 5 метрди түзөт. Учурда жол эксплуатациялоо ишканасы №23 жолду тазалоо боюнча атайын техникаларды колдонуп активдүү иш алып барууда.
Кыргыз Республикасынын транспорт жана байланыш министрлиги кесепеттерди жоюу боюнча иштер улантылып жатканын билдирет жана айдоочуларды убактылуу чектөөлөргө түшүнүү менен мамиле кылып, коопсуздук чараларын сактоого чакырат. Кошумча маалыматтар кийинчерээк берилет.
