Казакстандын Энергетика министрлиги мунай продуктыларын жана бензинди экспорттоого убактылуу тыюу салуу тууралуу буйрук чыгарды.
Бул тыюу 2025-жылдын 20-ноябрынан 2026-жылдын 20-майына чейин күчүндө болот жана ЕАЭБге кирген өлкөлөрдү да камтыйт. Документке ылайык, бензинди, дизель отунун жана башка мунай продуктуларын авто транспорт менен чыгарууга тыюу салынат. Бул товарларды темир жол транспорту менен экспорттоого да тыюу салынган.
Мындан тышкары, 2026-жылдын 1-январынан 30-июнга чейин жеңил дистилляттарды, авиация керосинди, дизель отунун, газойлдорду, ошондой эле толуол жана ксилол сыяктуу айрым химиялык заттарды жана мунай битумун ЕАЭБден тышкары чыгарууга тыюу салынат.
