Казакстанда Актау аэропортунун жанында болгон Azerbaijan Airlines (AZAL) учагынын кулашы боюнча тергөө аяктап калууда. Бул маалыматты өлкөнүн вице-премьери Канат Бозумбаев ТАСС агенттигине билдирген.
Бозумбаевдин айтымында, тергөө процессинин эки негизги багыты бар: биринчиси — Казакстандын Башкы прокуратурасы Россия жана Азербайжандык кесиптештери менен биргеликте жүргүзүп жаткан кылмыштык териштирүү, экинчиси — транспорт министрлиги жооптуу болгон техникалык тергөө.
«Транспорт министрлиги тергөө процессинин акыркы этабында турат. Учурда биз аэронавигациялык жабдуулар жана башка аспекттер боюнча лицензия берүүчүлөр же технология ээлеринин акыркы жыйынтыктарын күтүп жатабыз», — деди ал Мажилис жыйынында.
Вице-премьер ошондой эле министрлик тергөө иштерин 2025-жылдын аягына же 2026-жылдын башына чейин аяктоону пландап жатканын белгиледи. Башкы прокуратура да өз ишинде прогресс көрсөткөн. «Сиздер коңшу мамлекеттердин жетекчилеринин билдирүүлөрүн көргөн болушуңар, ошондуктан тергөө келерки жылы аяктайт деп үмүттөнөбүз», — деп кошумчалады Бозумбаев.
Мурда ал акыркы отчет 2023-жылдын аягына чейин Эл аралык жарандык авиация уюмунун талаптарына ылайык сунушталары тууралуу маалымдаган.
