Министрликтен билдиришкендей, мындай жалган маалыматтар эл аралык коомчулукту адаштырып коюшу мүмкүн.
Тажикстан бийликтери мамлекеттик чек араны ишенимдүү коргоо үчүн дайыма зарыл чараларды көрүп жатканын белгилешти.
«Чек арадагы абал туруктуу жана компетенттүү органдардын толук көзөмөлүндө», - деп кошумчалашты билдирүүдө.
2-декабрда кечинде Reuters, анонимдүү булактарга таянып, Тажикстан менен Россиянын жана Москва тарабынан колдоого алынган регионалдык күчтөрдүн арасында Ооганстан менен туруктуу эмес чек араны көзөмөлдөө үчүн аскерлерди жайгаштыруу боюнча мүмкүн болгон сүйлөшүүлөр тууралуу маалымдаган.
Бул маалымат кийинчерээк башка медиа тарабынан да жарыяланды.
Тажикстандын Тышкы иштер министрлигинин четке какканынан кийин Reuters агенттиги макаласын алып салды. Маалыматта материал «далилдердин жетишсиздиги аныкталгандан кийин» кайра чакыртылганы айтылган.
Жакында Ооганстандан Тажикстандын чек аралаш аймактарына болгон эки чабуулдун натыйжасында 5 кытай жараны курман болуп, дагы 5 адам жаракат алды. Тажикстан бул чабуулдарды катуу айыптап, «Талибандан» күнөөлүүлөрдү кармоо чараларын көрүүнү талап кылды.
Тажикстандын Тышкы иштер министри Сироджиддин Мухриддин «Талибан» Тышкы иштер министри Амирхан Муттаки менен телефондук сүйлөшүүлөрдү өткөрдү.
Ооган бийликтери окуяларды биргелешип иликтөөгө жана чек арадагы коопсуздукту күчөтүүгө даяр экенин билдиришти. Муттаки Тажикстандагы кытай жарандарынын өлтүрүлүшүн айыптап, чабуулдар региондогу өлкөлөр ортосунда «туруктуулукту жана ишенимди жоюу» максатында уюштурулган топтор тарабынан жасалганын белгиледи.
Ошол эле учурда, Кытайдын Душанбедеги элчилиги өз жарандарына Тажикстан жана Ооганстандын чек аралаш аймактарын таштап кетүүнү сунуштап, тажик бийликтеринен кытай жарандарынын жана компанияларынын коопсуздугун камсыздоо үчүн зарыл чараларды көрүүнү талап кылды.
