Маалыматка ылайык, 2025-жылдын 26-декабрында Москва районунун Ички иштер бөлүмүнө 1989-жылы туулган жергиликтүү тургун И.Э. кайрылган. Ал 2024-жылдан бери Г.А. аттуу жаран 25тен 30га чейин адамды кичи ГЭСтин курулушунда бетон иштерин аткаруу үчүн жалдаганын билдирген. Бирок өткөн жылдын декабрь айына карата 50-60 миң сомду түзүшү керек болгон айлык төлөнгөн эмес.
Чүй облусунун Ички иштер башкармалыгынын сүрөтү
Бул окуя боюнча Кыргызстандын Кылмыш кодексинин 209-беренеси «Алдамчылык» боюнча кылмыш иши козголду.
Тергөө учурунда Г.А. 1993-жылы туулган, «А.Г.Э.» компаниясы менен оозеки келишим боюнча субподрядчы катары иш алып баргандыгы аныкталды. Бетондоо иштеринин наркы 1 кубометр үчүн 5 500 сомду түзгөн. Өз ишин жүргүзүү үчүн жеке ишкер аялынан катталган.
Курулушта 100гө жакын жергиликтүү тургун иштеп, саатына 200 сом төлөнгөн. Бирок 2025-жылдын ноябрынан 8-декабрына чейин 25 жумушчуга айлык берилген эмес.
Тергөө учурунда аталган мезгилде 7 200 кубометр бетон иштери жана башка курулуш тапшырмалары аткарылганы белгилүү болду. Г.А. «А.Г.Э.» компаниясынан алган жалпы сумма 43 миллион 446 миң 878 сомду түзгөн, анын ичинен 3 миллион 115 миң сом салык катары төлөнгөн.
Г.А. КРнын Кылмыш процессуалдык кодексинин 96-беренесине ылайык кармалып, убактылуу кармоо жайына жайгаштырылды. Тергөө уланууда.
