Чүй облусунда укук коргоо органдары эки эркекти алдамчылыкка шектеп кармашты. Милициянын маалыматына ылайык, Бишкек шаарынын тургуну 2 388 148 сомдук зыянга учураган.
Чүй облусунун Ички иштер башкармалыгынын маалымат кызматына ылайык, 3-февралда Аламудун районунун ИИБсына М.М. аттуу жаран кайрылып, 2024-жылы аз тааныш эркек алдамчылык жолу менен анын 1 500 000 сом акчасын жана 20 000 долларлык минивэнди алып кеткенин билдирген. Шектүү кирпич жеткирүүнү уюштурамын деп убада берген, бирок акчаны алгандан кийин байланышка чыкпай калган.
Бул окуя боюнча Кыргыз Республикасынын Кылмыш кодексинин 209-беренеси боюнча кылмыш иши козголду.
Оперативдүү-тергөө иш-чараларынын жүрүшүндө шектүүлөр — 1993-жылы туулган Ж.Э. жана 1992-жылы туулган А.К. кармалды. Алар убактылуу кармоо жайына жайгаштырылды.
Мындан тышкары, тергөө А.К.нын бул райондо дагы беш алдамчылык окуясына байланыштуу болушу мүмкүн экенин аныктады. Ошондой эле, анын Чүй облусунун башка аймактарындагы ушундай кылмыштарга катышы текшерилип жатат.
Тергөө уланууда, милиция бул адамдардын курмандыгы болгон жарандарды Аламудун районунун ИИБсына же 0554 000922 жана 0777 794909 телефон номерлери аркылуу кайрылууга чакырат.
