12-февралда жүргүзүлгөн текшерүүнүн алкагында, Экстремизмге каршы күрөшүү жана мыйзамсыз миграция кызматынын кызматкерлери чет элдиктер иштеши мүмкүн болгон тигүү ишканаларын жана башка өндүрүш аянттарын текшеришти.
Натыйжада 90дан ашык чет элдик жаран милицияга жеткирилди. Басма сөз кызматынын өкүлдөрүнүн маалыматы боюнча, бул адамдар Кыргызстанга бир компания үчүн берилген визалар менен келишкен, бирок чындыгында башка уюмдарда иштеп жатышкан. Учурда алардын өлкөдөн чыгарылышы боюнча маселе чечилүүдө.
Мындан тышкары, рейд учурунда чет элдик жумушчуларды мыйзамсыз тартуу жана пайдалануу фактылары аныкталды. Жумуш берүүчүлөргө Кыргыз Республикасынын административдик жоопкерчилик кодексинин 93-беренеси («Кыргыз Республикасында чет элдик жумушчу күчүн тартуу жана пайдалануу эрежелерин бузуу») боюнча протоколдор түзүлдү, ошондой эле 65 миң сом өлчөмүндө айыппулдар салынды. Жалпысынан 8ден ашык компанияга айыппулдар жазылды.
