Берилген маалыматка ылайык, 2026-жылдын 28-февралында Токмок ШИИБине 1988-жылы туулган М.Х. аттуу жаран, кечээ болгон окуя боюнча жардам сурап кайрылган. Анын айтымында, 27-февралда, саат 22:30 чамасында, Сарбагышев көчөсүндөгү үйүнүн жанында белгисиз адамдар аны жана анын бир туугандарын дене жаракаттарына учураткан.
Токмок шаардык ооруканасы тарабынан берилген медициналык маалымдама М.Х. жана 1996-жылы туулган анын бир тууганы М.А. жабыркаганын, жабык череп-ми жаракаты, мээнин сотрясениясы, ошондой эле көгөргөн жаракаттар жана башка жаракаттар бар экенин тастыктап турат.
Бул окуя боюнча Токмок ШИИБи Кыргыз Республикасынын Кылмыш-жаза кодексинин 280-беренеси (хулигандык) боюнча кылмыш ишин козгоду.
Оперативдүү-издөө иш-чараларынын натыйжасында милиция кызматкерлери шектүүлөрдүн ким экенин аныктап, 2007-жылы туулган Ш.А. жана П.С. аттуу эки шектүүнү кармашты.
Кыргыз Республикасынын Кылмыш-процессуалдык кодексинин 96-беренесине ылайык, кармалгандар убактылуу кармоо жайына киргизилди. Шаардык сот тарабынан бир айга камакка алуу чарасы белгиленди.
Тергөө учурунда зарыл болгон соттук-медициналык экспертизалар дайындалды. Учурда окуянын бардык жагдайларын аныктоого жана мүмкүн болгон катышуучуларды табууга багытталган тергөө аракеттери жана оперативдүү иш-чаралар жүргүзүлүүдө.
