15-мартта, таңкы саат 6:47 чамасында Токмок шаарындагы ИИБге 3-микрорайондо бир батирде эркек кишинин бычак менен жаракат алгандыгы тууралуу маалымат келип түшкөн.
Окуя болгон жерге тергөө-оперативдик топ келгенде, батирде 1980-жылы туулган М.Б. аттуу маркумдун сөөгү табылган. Анын денеси отурган абалда, көкүрөк бөлүгүндө бычак менен жаракат алып, тирүү белгиси жок болгон.
Бул окуя боюнча Кыргыз Республикасынын Кылмыш-жаза кодексинин 122-беренесинде (өлтүрүү) каралган кылмыш белгилери боюнча кылмыш иши козголгон.
Тергөө учурунда маркумдун жарандык жолдошу, 1974-жылы туулган К.Ж. тарабынан өлтүрүүчү жаракат берилгени аныкталган. Алгачкы маалыматтар боюнча, сөз талаш учурунда ал маркумду ашкана бычагы менен көкүрөгүнө урган, бул болсо анын окуя болгон жерде өлүмүнө алып келген.
М.Б.нын сөөгү Токмок шаарынын моргуна жөнөтүлгөн. Окуя болгон жерден бычак алынган жана тергөө үчүн соттук-медициналык экспертизалар дайындалган.
Кыргыз Республикасынын Кылмыш-процессуалдык кодексинин 96-беренесине ылайык, К.Ж. кармалып, убактылуу кармоо жайына жайгаштырылган.
