Бүгүн Ош шаарында муниципалдык авто транспорттук ишкананын жаңыланган имараты ачылды.
Жергиликтүү бийликтин берген маалыматына ылайык, салтанаттуу иш-чарада шаар башчысы Жеңишбек Токторбаев, шаардык кеңештин төрагасы Болот Баетов жана ишкананын кызматкерлери катышты.
Бул имараттын курулган убагынан бери капиталдык оңдоп-түзөө жүргүзүлгөн эмес. Жылдын башында мэр ишкананын абалы менен таанышып, кызматкерлер үчүн эмгек шарттарын жакшыртуу максатында оңдоп-түзөө иштерин жүргүзүүнү тапшырган.
Жүргүзүлгөн иштердин натыйжасында үч кабаттуу имараттын фасаддык жана ички бөлүктөрү толук капиталдык оңдоп-түзөөдөн өттү. Ошондой эле 1 500 чарчы метр аянт асфальтталды. Мындан тышкары, таза суу үчүн насостор жаңыртылып, аймакты көрктөндүрүү иштерин жүргүзүлдү.
«Бул мекемеде 360 адам иштейт. Анын карамагында 181 автобус жана троллейбус бар. Учурда мекеме 2 троллейбус жана 9 автобус маршрутуна кызмат көрсөтүүдө», - деп такташты мэриядан. ```
