Уюштуруучулардын айтымында, климаттын өзгөрүшү Кыргызстан үчүн эң олуттуу көйгөйлөрдүн бири болуп саналат жана экология темасы исламдык баалуулуктар менен тыгыз байланышта. Алар диний мекемелер мамлекет жана коомдук уюмдар үчүн климаттык билимдүүлүктү жогорулатууда маанилүү өнөктөштөр болушу мүмкүн экенин баса белгилешет.
Долбоордун менеджери Таазима Темирова билдиргендей, анкетага катышкан 300гө жакын дин кызматкерлеринин 94,7%ы табиятка кам көрүү алардын диний жана моралдык милдети деп эсептешет. Ошондой эле, 86,8% катышуучулар айлана-чөйрөнүн абалы боюнча өздөрүнүн тынчсыздануусун билдиришкен, ал эми 98% климат боюнча билим алууга даяр экендиктерин билдиришкен.
80% дан ашык респонденттер имамдар экологиялык көйгөйлөрдү, адатта, тазалыкка жана орточулукка чакыруулар аркылуу талкуулап жатканын белгилешти. Ошол эле учурда уюштуруучулар методикалык материалдардын жетишсиздиги жана бул багытта системалуу иштердин жоктугун белгилешти.
Анкетанын жыйынтыктарына ылайык, 64,6% катышуучулар экологиялык көйгөйлөрдү адамдардын табиятка жоопкерсиз мамилеси менен байланыштырса, 32,1% диний-ахлактык баалуулуктардын төмөндөшүн себептердин бири катары көрсөтүштү.
“МувГрин” коомдук уюмунун директору Азат Мурадыл мечиттерди жана медреселерди экологиялык темаларды талкуулоого тартуу коомдун климаттык өзгөрүүлөргө жана экологиялык маселелерге жоопкерчиликтүү мамилесин түзүү үчүн натыйжалуу жолу болушу мүмкүн деп эсептейт.
“Бул изилдөө биринчи жолу диний мекемелер мамлекет жана НПОлор үчүн климаттык билим берүүнү илгерилетүүдө күчтүү союздаштар болушу мүмкүн экенин көрсөттү. Имамдар жана медреселер ишенимге жана моралдык авторитетке ээ, жана дин аркылуу жасалган чакыруулар административдик көрсөтмөлөрдөн тереңирээк кабыл алынат”, — деп белгиледи Азат Мурадыл.
“МувГрин” коомдук уюмунун пилоттук долбоорунун алкагында 60 дин кызматкерин табиятка кам көрүү боюнча контентти түзүү жана илгерилетүү боюнча окутуу пландалууда. Келечекте долбоорду өлкөнүн бардык аймактарына жайылтуу мүмкүн.
