Бүгүн Бишкекте азык-түлүк коопсуздугу бөлүмү негизги азык-түлүктөрдүн бааларын изилдөө жүргүздү, ар кандай базарларга жана ири соода тармактарына барды.
Агроөнөржай министрлиги берген маалыматка ылайык, мониторинг жүргүзүү учурунда азык-түлүк бааларында олуттуу өзгөрүүлөр байкалган, ошондой эле соода түйүндөрү арасында баалардын айырмачылыктары болгон.
Эт азыктарына өзгөчө көңүл бурулду. Кээ бир дүкөндөрдө жана базарларда эттин баасы 650ден 720 сомго чейин өзгөрүп турган.
Баалардагы мындай айырмачылыктардын себептерин аныктоо үчүн адистер сатуучүлөр жана сатып алуучулар арасында суроо алуу жүргүзүштү. Алар баалардын өзгөрүшүнө бир нече факторлор таасир этерин белгилешти:
- малдын жеткирүү бааларынын өзгөрүшү;
- кээ бир аймактарда сунуштун кыскарышы;
- логистика чыгымдарынын жогорулашы;
- сезондук өзгөрүүлөр.
«Министрлик азык-түлүк коопсуздугун камсыздоо үчүн рыноктук абалды күн сайын мониторингдөөнү улантат», - деп кошумчалашты ведомстводон.
