Бул стратегиялык план Кыргызстанды, Тажикстанды жана Өзбекстанды камтыйт, ошондой эле эл аралык финансылык уюмдар жана адистештирилген мекемелер менен кызматташуу пландаштырылууда. Документтин негизги максаты — совет мезгилинде уран өндүрүүдөн жабыркаган жерлерди этап-этабы менен калыбына келтирүү жана тазалоо.
Программанын жалпы баасы 113 миллион евро, бул курулуш жана инженердик иштерди, долбоорлорду башкарууну, күтүлбөгөн чыгымдар үчүн резервдерди жана кошумча чыгымдарды камтыйт. Бардык эсептөөлөр учурдагы контрактыларга жана актуалдуу сметаларга негизделген.
Маанилүү белгилеп кетүүчү жагдай, жаңы стратегия мурда приоритеттүү эмес деп эсептелген төмөн экологиялык жана социалдык-экономикалык коркунучтарга ээ объектилерди да камтыйт. Эки тараптуу келишимдердин алкагында Россия Кыргызстандагы объектилерди рекультивациялоого 21,4 миллион евро жана Тажикстандагы ушундай эле иштерге 15,6 миллион евро бөлүп жатат.
МАГАТЭде бул планды ишке ашыруу аракеттердин кайталоосун болтурбоо, жүргүзүлүп жаткан иштердин ачыктыгын жогорулатуу жана региондогу уран калдыктарын тазалоону аяктоо үчүн кошумча эл аралык ресурстарды тартуу мүмкүнчүлүгүн берет деп баса белгилешет.
