Күз-кыш мезгилинде Транспорт министрлиги тоо аймактарында өтүүнү катуу көзөмөлдөйт. Жүргүнчүлөрдү «Сосновка» жана «Кара-Кол» транспорттук көзөмөл пункттарында жаңы эрежелерди сактоонун зарылдыгы тууралуу эскертет.
Ведомствонун маалыматы боюнча, учурда бул посттордо автоунааларды текшерүү жүргүзүлүүдө.
Кышкы шина жана тайгакка каршы чынжырлары жок транспорттук каражаттар өткөрүлбөйт.
Министрлик, ашууларга чыгууда жайкы шиналарды кышкы шиналарга алмаштырып, тайгакка каршы чынжырларды алып жүрүүнү эскертет. Бул чаралар жолдордо коопсуздукту камсыздоо үчүн зарыл.
Мындан тышкары, жүргүнчүлөргө ашууларда унаа айдоонун эрежелерин сактоону катуу сунуштайт: каршы тилкеге чыкпоо, кар тазалоочу техниканын ишине тоскоол болбоо жана унаалар арасында 500 метрден кем эмес аралыкты сактоо.
Министрликке караштуу жол эксплуатациялоочу ишканалар жолдордун абалын үзгүлтүксүз көзөмөлдөп, аба ырайынын өзгөрүүлөрүнө жана ашуулардагы кырдаалга ыкчам жооп берүүгө даяр.
