Чүй облусундагы мүмкүнчүлүгү чектелген жетим кыз Акыйкатчынын кийлигишүүсүнүн натыйжасында 518 миң сомдук социалдык жардам алат. Бул тууралуу КРнын Акыйкатчы институту маалымдады.
2025-жылы аталган институттун кызматкерлери облустагы балдар үйүндөгү балдардын жашоо шарттарын текшеришип, бир катар мыйзам бузууларды аныктап, алардын жоюу боюнча сунуштар беришкен.
Мониторингдин жүрүшүндө айрым жетимдердин мамлекеттен алган төлөмдөрүн албай калгандыгы белгилүү болду.
2008-жылы төрөлгөн М.Б. 2017-жылдан бери ата-энеси каза болгондон кийин эжеси менен Чүй облусундагы балдар үйүндө жашап келет.
Ал 2015-жылы медициналык-социалдык экспертиза комиссиясы (МСЭК) тарабынан мүмкүнчүлүгү чектелген деп таанылып, ага жардам берилген жана психиатрдын көзөмөлүндө болуу жана инклюзивдик программа боюнча билим алуу сунушталган.
Бирок, 2017-жылы балдар үйүнө өткөрүлгөндөн кийин, кыз кайрадан текшерүүдөн өтпөгөндүктөн, төлөмдөр токтотулган.
Сегиз жыл бою комиссиядан кайрадан өтүү үчүн эч кандай чаралар көрүлгөн жок.
КРнын Акыйкатчысы Жамиля Джаманбаева Башкы прокуратурага жана Эмгек, социалдык камсыздоо жана миграция министрлигине жетимдердин укуктарын коргоону күчөтүү жана төлөнбөгөн жардамдарды кайтаруу боюнча өтүнүч менен кайрылды.
Текшерүүнүн натыйжасында Эмгек министрлиги жооптуу кызматкерлерге дисциплинардык чараларды көрдү, ал эми кызга 2017-жылдан 2026-жылдын 1-майына чейин жардам кайрадан берилди. Натыйжада, анын депозиттик эсебине 518 миң сом которулат.
Акыйкатчы, «Балдар жөнүндө» кодексинин 17-беренесине ылайык, балдардын укуктарын камсыз кылуу мамлекеттик бийлик органдарынын жана жергиликтүү өз алдынча башкаруу органдарынын милдети экенин белгиледи.
