Ал ведомство өзүнө жүктөлгөн милдеттерди аткарып, күтүүлөрдү да ашып өткөнүн белгиледи. "Мамлекет — бул дайыма адаптацияланып, эволюцияланып туруучу динамикалык структура. Кечээ улуттук коопсуздук алдында бир маселелер турган болсо, бүгүн — таптакыр башка маселелер. Бул факторлорду эске алып, УКМК актуалдуу коркунучтар жана дүйнөдөгү өзгөрүүлөр менен натыйжалуу күрөшүү үчүн олуттуу реформаларды күтүп жатат", — деп баса белгиледи Жапаров.
Мындан тышкары, президент коррупция жана кылмыштуулукка каршы күрөш уланарын кошумчалады.
"Бул иштер 24 саат бою жүргүзүлүүдө. Мен ар дайым жана мындан ары да бул багыттарда чечкиндүү аракеттерди талап кылам. Бардык мамлекеттик кызматкерлер бул нерсени жакшы түшүнүшөт. Биз өлкөбүздөгү кылмыштуулукту жана коррупцияны жоюшуубуз керек", — деп белгиледи президент.
