Бул жылдан баштап психология жана педагогика тармагында адистерди даярдоо башталат.
Илим, билим берүү, инновациялар жана маалыматтык технологиялар, маданият, спорт жана жаштар иштери боюнча комитеттин жыйынында депутат Гулшаркан Култаева билим берүү мекемелериндеги психологдордун жетишсиздиги тууралуу маанилүү теманы көтөрдү.
Ал профилдик министрликтердин өкүлдөрүнө мектеп психологдорунун санын көбөйтүү мүмкүнчүлүгү тууралуу суроо узатты.
Каржы министринин орун басары Жибек Дуйшеева анын суроосуна жооп берип, Билим берүү министрлиги менен биргеликте токтом долбоорун иштеп чыгуу боюнча маалымат берди.
«Бүгүнкү күндө, бардык зарыл уруксаттардын болушуна карабастан, кадр жетишсиздиги актуалдуу бойдон калууда. Ошондуктан адистерди даярдоо жана алардын жеткиликтүүлүгүнө жараша райондук деңгээлде этап-этабы менен иш жүргүзүү чечими кабыл алынды, андан кийин — мектептерге бөлүштүрүлөт», — деп түшүндүрдү ал.
Өз тараптан, илим, жогорку билим берүү жана инновациялар министринин орун басары Дурус Козуев университеттерде «Психология» багыты боюнча кафедралар жана факультеттер бар экенин кошумчалады.
«Анткен менен, акыркы убакта квалификациялуу психологдордун жетишсиздиги курч болуп турат. Ошондуктан бул маселе өзгөчө көңүл бурулууда, жана бул жылдан баштап психолог-педагогдорду даярдоо үчүн жаңы окуу профилдери киргизилет», — деп белгиледи ал.
