Владимир Александрович Максимов Кыргызстандын китеп графикасынын тарыхына негизинен тартылган шрифттин устаты катары кирди. Анын бул тармактагы изилдөөлөрү китепти конструирлөө жана дизайны, плакатта, экслибрис менен иштөө менен байланыштуу. Шрифттик композицияларда ал жогорку графикалык маданиятты, көркөм дөөлөттү, чыгармачылык фантазияны көрсөтөт. Анын мыкты иштеринин катарына «Советтик Кыргызстан» фотоальбомунун шрифттик бөлүгү (Фрунзе: Кыргызстан, 1974), «Лидия Александровна Ильина» альбомунун титулдук барагындагы шрифттин чечими (Фрунзе: Кыргызстан, 1976), Б. Будайчиев жана Л. Прыткова тарабынан жазылган «Тургумбай Садыков» китебинин шрифттик дизайны жана макети (Фрунзе; Кыргызстан, 1985) жана башка иштер кирет. 1971-жылы Максимов Дрезденде СЭВ өлкөлөрүнүн шрифттеринин эл аралык конкурсуна катышкан. Ал сунуштаган шрифт гарнитураларынын бири ыраазычылык сыйлыгы менен, экинчиси диплом менен сыйланган. Максимов «Ала-Too» шрифтин долбоорун иштеп чыккан, ал Шадринск полиграфиялык машина куруу заводунда куюлган. 1979-жылдан бери ушул шрифт менен «Кыргызстан» басмаканасы тарабынан чыгарылган китептердин бир бөлүгү басылып жатат.
