1970—1980-жылдарда көрнөк-жарнактын идеялык жана көркөм деңгээлин жогорулатуу тенденциясы менен саясий плакат массалык болуп баратат. Бул мезгилде анын саясий жана эмгек активдүүлүгүн, идеологиялык күрөш жана тынчтык үчүн кыймыл, социалисттик сынашты уюштуруу, партиянын агрардык саясатын ишке ашыруу, патриоттук демилгелерди жайылтуу, өндүрүш дисциплинасын бекемдөө, жетилген социализм коомунун мүмкүнчүлүктөрүн жана артыкчылыктарын пропагандалоодогу ролу кыйла жогорулады.
Партия тарабынан идеологиялык, саясий-тарбиялык ишке коюлган жаңы талаптар коммунисттик агитация жана пропаганда искусствосуна, саясий плакатка да тиешелүү. Жогорку коммунисттик аң-сезимди, өлкөбүздүн курулуш пафосун, эмгек дисциплинасын, коомдук кызыкчылыктарга берилгендикти пропагандалоо кыргыз плакатчыларынын негизги темаларын аныктады, алар советтик саясий плакаттын мыкты традицияларын өнүктүрүп, заманбап тажрыйба менен байытты.
Кыргыз плакатынын ардагерлери В. Жуков, Ф. Зубахин, А. Турумбеков менен бирге, бул тармакта М. Бекджанов, У. Омуров, М. Султаналиев, А. Асямов, А. Цыганок, К. Шкурпела өздөрүнүн эмгектеринде Коммунисттик партиянын тышкы жана ички саясатынын сыпатын, советтик адамдын идеялык-ахлактык тарбия маселелерин чагылдырып, өздөрүн жаркырап көрсөтүштү.
