Кинооператор. 1938-жылдын 16-июлунда Кемерово облусунун Ленинск-Кузнецк шаарында кызматкердин үй-бүлөсүндө төрөлгөн. 1957-жылы Фрунзе шаарындагы орто мектепти аяктагандан кийин геологиялык изилдөө тобунда буровик болуп иштеген, Аламедин айылындагы «Прогресс» фабрикасында фанговщик болуп иштеген.
1959-жылы «Киргизфильм» студиясына тартуучу техниканын механиги болуп кирген, 1961-жылы кинооператордун ассистенти кызматына өтөт. Л. Шепитько тарабынан тартылган «Зной» (1963), А. Бергунке тарабынан тартылган «Джура» (1964), А. Михалков-Кончаловский тарабынан тартылган «Первый учитель» (1965), М. Убукеев тарабынан тартылган «Белые горы» (1964), Д. Храбровицкий тарабынан тартылган «Перекличка» (1966, «Таджикфильм»), М. Ковалев тарабынан тартылган «У каждого своя дорога» (1967) фильмдеринде экинчи оператордун милдеттерин ийгиликтүү аткарган. Т. Океев тарабынан тартылган «Небо нашего детства» (1966), И. Шульман тарабынан тартылган «И никто другой» (1968, «Беларусь-фильм»), Т. Океев тарабынан тартылган «Поклонись огню» (1972) фильмдеринде экинчи оператор болуп иштеген. 1966-жылы Москва мамлекеттик маданият институтун сырттан аяктаган. С. Чадин документалдык фильмдерде «Застава» (1968), «Абсолютный возраст» (1969), «Моя Турсун-апа» (1970, «Киргизтелефильм»), «Счастливый человек» (1972), «Вершина дружбы» (1972), «Арча» (1974), «Народная дружина» (1975) ж.б. өзүнүн чыгармачылык жетилгендигин, көз карашын көрсөтөт. 1969-жылы тартылган «Памир — Кришна мира» аттуу түстүү киноочерки VIII Орто Азия жана Казакстан кинооператорлорунун көргөзмөсүндө мыкты оператордук иши үчүн 3 диплом менен сыйланган. Бул фильм 1970-жылы Тегеран шаарында өткөн Эл аралык кинофестивалда «Күмүш дельфин» сыйлыгына ээ болгон.
