Бишкекте А.Осмонов атындагы Улуттук китепканада 20-мартта китеп-иллюстрация көргөзмөсүнүн ачылышы болот – «Бар бололу, түгөнбөйлү, курдаштар, Узак, узак, узак болсун бул сапар. Кылым бүтүп, дүйнөдөн жок болсок да, Кайра кайтып, жолугушчу жолдор бар!» жана белгилүү кыргыз акыны Алыкула Осмоновдун туулган күнүнүн 100 жылдыгына арналган Эс тутуу күндөрү. Бул тууралуу 19-мартта китепкананын басма сөз кызматы маалымдады.
Маалыматка ылайык, акындын Эс тутуу күндөрүнүн алкагында Кыргыз Республикасынын эл артисти Каныкей Эралиева, композитор Жамийлы Муратова, «Ак Шоола» балдар хору, эл аралык чыгармачылык академиясынын «Нурборбор» өкүлдөрү, Чынгыз Мамаев театрынын артисттери, Нурзат Кадыркулова, ошондой эле Дуйшенбек Укуев, Ажыбеков Шаршенбай жана башкалар чыгышат.
Китеп-иллюстрация көргөзмөсүндө А.Осмоновдун жашоосу жана чыгармачылык жолу жөнүндө китептер, газеталык жана журналдык макалалар, иллюстрациялар көрсөтүлөт.
Иш-чарага коомдук ишмерлер, илим, маданият жана билим берүү өкүлдөрү, жазуучулар, акындар, жогорку окуу жайларынын студенттери, окуучулар жана Алыкула Осмоновдун талантына күйөрмандар катышат.
