Билим берүү министрлигинин басма сөз кызматынын маалыматына ылайык, иш-чарага өкмөт башчынын орун басары Эдиль Байсалов, билим берүү министри Догдуркүл Кендирбаева, ошондой эле ар кандай мамлекеттик структуралардын жана эл аралык уюмдардын өкүлдөрү катышты.
Талкуулоонун жүрүшүндө адамдык капиталды өнүктүрүү, сектор аралык кызматташтык жана Доха декларациясын ишке ашыруу, ошондой эле Кыргызстандын аталган декларация жана Улуттук өнүктүрүү программасы-2030 алкагында жетишкендиктери боюнча акцент коюлду.
Эдиль Байсалов өлкөдө социалдык колдоону кеңейтүүгө жана адамга багытталган мамлекеттик саясатты түзүүгө багытталган реформалар активдүү ишке ашырылып жатканын белгиледи.
Догдуркүл Кендирбаева билим берүү реформалары келечектеги адамдык капиталды түзүү үчүн өтө маанилүү аспект экенин баса белгиледи.
«Бүгүн Кыргызстан жаңы билим берүү системасын түзүүдө маанилүү кадамдарды жасап жатат, бул биздин келечектеги адамдык капиталыбыздын сапатын аныктайт. Дохадагы жолугушуулардын жыйынтыктары көрсөткөндөй, биздин аракеттер дүйнөлүк тренддерге толугу менен жооп берет. Биз билим берүү программалары, инфраструктура, цифрлаштыруу, гендердик теңдик жана инновациялар боюнча бизди колдоого даяр өнөктөштөрдү таптык. Мамлекет, эл аралык уюмдар жана эксперттердин биргелешкен аракеттери аркылуу гана биз ар бир бала үчүн ийгиликтүү келечектин кепили болгон сапаттуу билим берүүнү камсыздай алабыз», - деди ал.
Консультациялардын учурунда туруктуу финансылык камсыздоо, адамдык капиталды өнүктүрүү жана мамлекеттин өнөктөштөр менен кызматташтыгы аркылуу Улуттук өнүктүрүү программасы-2030 максаттарына жетүү маселелери да талкууланды.
