4-ноябрдан 6-ноябрга чейин Кыргызстан делегациясы Катарда өтүп жаткан экинчи дүйнөлүк социалдык өнүгүү саммитине катышууда, деп билдирет КР Билим берүү министрлиги.
Саммиттин алкагында Кыргызстан «Адамдык капиталга инвестициялар: КР программалары жана мыкты практикалары» аттуу атайын сессию уюштурду, ал ЮНИСЕФ жана Marshall Cavendish Education тарабынан колдоого алынды.
Бул сессия өлкөдөгү билим берүү реформаларынын негизги багыттарына, анын ичинде адамдык капиталды өнүктүрүүгө, адилеттүү жана туруктуу билим берүү системасын түзүүгө, ошондой эле жаштарды заманбап дүйнөнүн талаптарына даярдоого арналган.
Кыргызстан өлкөдө билим берүү реформалары кандайча ишке ашып жатканын, атап айтканда, 12 жылдык билим берүүгө өтүүнү көрсөттү. Ошондой эле STEM-лабораторияларын түзүү, кыздардын билим алууга тең мүмкүнчүлүктөрүн камсыздоо, мектепке чейинки билим берүүнү өнүктүрүү, экологиялык маданиятты калыптандыруу жана профессионалдык-техникалык билим берүүнү күчөтүү сыяктуу приоритеттүү багыттар белгиленди.
Министрлик белгилегендей, эч бир өлкө билим берүү трансформациясын жалгыз өзү жүргүзө албайт, глобалдык чакырыктар жана климаттык коркунучтар шартында эл аралык кызматташтыктын маанилүүлүгүн баса белгиледи.
«Билим берүүгө инвестициялар — бул келечекке, туруктуу коомго жана аң-сезимдүү жарандарга инвестициялар. Билим берүү адамдын өз-өзү менен, айланасындагылар менен жана планетада гармониялуу жашоосуна мүмкүнчүлүктөрдү түзөт», — деди билим берүү министри Догдуркул Кендирбаева.
