Microsoft компаниясынын негиздөөчүсү жана белгилүү миллиардер Билл Гейтс Кытай термоядердик синтез жаатында өзгөчө жетишкендиктерди көрсөтүп жатканын, бул тармакка башка бардык өлкөлөрдүн инвестициясынан эки эсе көп каражат жумшап жатканын белгиледи. Гейтс бул сөздөрүн Блумберг агенттигине берген интервьюсунда айтты.
«Алардын термоядердик синтез жана ядролук бөлүнүү боюнча жетишкендиктери таң калыштуу... Кытайдын термоядердик синтезге болгон инвестициялары башка өлкөлөрдүкүнөн эки эсе көп», - деп агенттик Гейтстин сөздөрүн келтирет.
Ошондой эле Гейтс Кытайдын АКШ жана башка мамлекеттер менен заманбап ядролук реакторлорду иштеп чыгууда активдүү атаандашып жатканын, бул маалымат борборлорундагы өсүп жаткан энергия муктаждыктарын канааттандыруу үчүн жаңы энергия булактарын издөө зарылдыгынын фонуна байланыштуу өзгөчө маанилүү болуп жатканын баса белгиледи.
