Бул жыйым салык эмес төлөмдөргө тиешелүү болуп, өлкөгө киргенде, чыкканда, ошондой эле, көпчүлүк учурларда, жашоо жайларында катталганда туристтерден алынат.
Учурда мыйзам долбоору коомдук талкуу стадиясында турат.
Каржы министрлиги берген маалыматка ылайык, Кыргызстандын туристтик жайларын зыярат кылган чет өлкөлүк туристтердин саны 2012-жылы 300 миңден 2024-жылы 9 миллионго чейин өскөн.
2023-жылы туристтик инфраструктураны курууга 23 миллиард сомдон ашык каражат жумшалды, бул өткөн жылга салыштырганда 27,1%га көп.
Негизги инвесторлор катары Казакстан, Бириккен Араб Эмираттары, Россия, АКШ, Кытай жана Швейцария көрсөтүлгөн.
Министрлик ошондой эле туристтик жыйымдар жана салыктар туристтик инфраструктураны өнүктүрүү жана ар кандай өлкөлөрдө туристтердин агымын башкаруу үчүн эффективдүү инструмент экенин белгиледи. Кыргызстандын регионалдык туристтик инфраструктурасын өнүктүрүү үчүн мамлекеттик колдоо жана альтернативдүү финансылык булактарды издөө зарыл.
«Бул сунуштун ишке ашырылышы туризмдин туруктуу өнүгүшүнө, анын экономикага кошкон салымын көбөйтүүгө жана Кыргызстандын эл аралык аренада атаандаштыкка жөндөмдүүлүгүн сактоого көмөктөшөт», — деп айтылат Каржы министрлигинин билдирүүсүндө.
Документке ылайык, туристтик жыйымды төлөөчүлөр мейманканалар, отелдер, хостелдер, санаторийлер жана эс алуу үйлөрү сыяктуу убактылуу жашоо жайларынын ээлери же ижарачылары болот. Жыйым бул объектилерде убактылуу жашаган жеке адамдардан алынат.
Министрлер кабинети туристтик жыйымдын өлчөмүн, эсептөө тартибин жана төлөө мөөнөттөрүн аныктайт.
