Жаңы салык эмес төлөм — туристтик жыйым киргизүү сунушталууда, ал чет элдик коноктордон, отелдерде, мейманканаларда, хостелдерде, санаторийлерде, эс алуу үйлөрүндө жана конок үйлөрүндө убактылуу жашаган адамдардан алынат.
Жыйымды төлөө жоопкерчилиги жайгаштыруу объектилеринин ээлерине же ижарачыларына жүктөлөт, бирок чыныгы төлөөчүлөр туристтердин өздөрү болот. Жыйымдын так өлчөмү жана төлөө тартиби министрлер кабинетинин тарабынан аныкталат. Жыйналган каражаттар туристтик инфраструктураны өнүктүрүүгө жана маданий мурастарды коргоого жумшалат деп пландалууда.
Ошондой эле өзгөртүүлөрдө салык органдары жыйымды чогултууну көзөмөлдөп, аны мамлекеттин салык эмес кирешелеринин бир бөлүгү катары эсептеши каралган.
Мыйзам долбоору 2027-жылдын 1-январынан тартып күчүнө кириши мүмкүн.
