Туристтер 64 өлкөдө бекер жашай алышат

Ар түрдүү өлкөлөрдүн мейманканалары туристтерди бекер кабыл алат

18-ноябрдан 24-ноябрга чейин ар түрдүү өлкөлөрдөгү мейманканаларда World Barter Week акциясы өтөт, анын алкагында дүйнө жүзү боюнча жүздөгөн мейманканалар конокторго «бартер менен» жашоону сунушташат. Бул тууралуу «Маэстро – Жаңылыктар» жазып чыкты.

Туристтер тандаган мейманканада эч кандай төлөмсүз токтоло алышат, бирок анын ордуна алар пайдалуу көндүмдөрдү, товарларды же кызматтарды сунушташы керек: бул чет тилдерден сабак берүү, интерьер үчүн сейрек нерселер, дубалдарды боёо ж.б.

Мисалы, Тайланддын Краби провинциясындагы Klong-muang-inn мейманканасы конокторду бекер кабыл алат, эгер алар мекеменин аймагында оңдоо иштерине жардам берсе. Ал эми Франциянын Ван шаарындагы La Maison Blanche Aux Volets Bleus конок үйү бакчада иштөө же алардын веб-сайтын испан жана италия тилдерине которуу үчүн түнөө менен таңкы аш жана бекер Wi-Fi сунуштайт.

World Barter Week акциясы 2009-жылы Италиянын Сардиниясында биринчи жолу өткөрүлгөн. 10 жылдан кийин бартер менен жашоо үчүн 64 өлкөдө 407 жайгашуу объектиси сунушталууда. Алардын ичинен Римде 20дан ашык мейманкана жайгашкан. Бул жылы проектке Түштүк-Чыгыш Азия өлкөлөрү: Камбоджа, Индия, Индонезия, Малайзия, Непал, Филиппиндер, Шри-Ланка, Тайланд да кошулду. Бекер жашоону Bed&Breakfast категориясына кирген мейманканалар жана конок үйлөрү, ошондой эле батирлер сунуштайт.

Ошондой эле Barter Week акциясына Италия, АКШ, Улуу Британия, Болгария, Россия, Польша, Португалия, Түркия, Испания, Швейцария жана башка өлкөлөрдүн мейманканалары катышууда.